|
|||||||||||||||||||||||||||||||||||||||||||||||||||||||||||||||||||||||||
|
|||||||||||||||||||||||||||||||||||||||||||||||||||||||||||||||||||||||||
<< natrag
print
e-mail
print
e-mail
Popevke smo slagaleStela Pavetić, 2.11.2007. Evo, sela sam se i nekaj bi napisala. Ne znam još baš kaj, ali koristim onu prvu metodu: sedni si, počni pisati i nekaj bu ti već palo na pamet. No da, pišem… i pišem… Još nikaj. Gledim onu našu seriju – Ratkajeve, pa je tak zanimljiva da sam si rajši sela i počela pisati. Dugo je več prešlo od da sam zadnji put pisala. Puno se toga dogodilo, dobroga i manje dobroga. Još navek lučem čez ključanicu, ali slabo kaj vidim. Malo sam očoravela, ili se možda ključanica stisnula, pa baš ne vidim dobro. Aha, i nemam baš preveč vremena, pa baš i ne hodam na probe, tak da nekaj z prve ruke baš i nemrem napisati. No, kaj? Pak ve su takva vremena, znam da baš to i ni v redu, ali kaj morem? Delam na tri mesta, hodam okoli i puščam kojekakvima samozvanima stručnjakima da me nekaj nafčiju, a za ono kaj mi krepi dušu, za to imam najmanje vremena. Nadam se da se bu nekaj premenilo, i to brzo, jer ovak, bez plesanja, popevanja i huškanja baš i nije zabavno. Hodam na probe naše pjevačke skupine, „starih koka“ (onak več po domaći rečeno), jer kaj se mora, mora se. Nismo zabadaf nadglasale se one koji su skup z nami popevali na županijskoj smotri. Ve moramo to i opravdati. A za to se treba i te kak pomučiti. A još kaj novoga ima! Više ne trubimo na staro potrtalo od harmonija, nego nam je KUD kupil novoga trubentača. Vam je naš predsednik več se napisal o njemu. Je, to vam je onaj Japanac kojega stalno spominje. Dela kak vurica. Ima centralnu poziciju vu našoj formaciji. Prvo dojde teta Zdenka, pak Japanac, pak smo mi na dva reda – prvi glas i drugi glas. No, imamo mi i treći glas – to su oni kaj čist na duboko brundaju vu sakoj pesmi, ali nekak nismo nafčene nametati tri klupe. Ovak je nekak prisnije, v trokut. Jedna klupa za prvi glas, jedna za drugi i treći. Samo kaj nekak ne štima omjer. Nas je v prvom glasu jedva tri. I fino se rasprostremo na jednoj klupi, dok se drugi i treći glas stišče na jeni klupi – njih šest. Skoro sam napisala sedam. Bilo nas je inače se skup deset, ali nam je jena otišla na bauštelu – nikam drugam nek v Ameriku. I tak, dok se ona ne vrne, ima nas devet. No, i tak vam si mi lepo sednemo, zgrijemo si klupice, i moremo delati. Prvo treba zgrijati aparate – glasnice. Istina bog, mi si ih čist dost zgrijemo i prije probe, treba nadoknaditi tjedan dana kaj se nismo vidle, potračati, spripovedati se kaj nas muči ili smeta, ili kaj nam se dogodilo dobroga od zadnje probe. Ali, nebi teta Zdenka bila teta Zdenka, da nebi zagrijala naše glasnice onak kak to bog zapoveda. Pa onda malo aaaaačemo, pa onda uuuučemo, eeeečemo, iiiičemo, popevamo ljestvicu na se moguće načine, vežbamo trbušne mišiće (tak, dobro ste vidli) dok isprekidano popevamo samoglasnike (morate probati – bole je od trbušnjaka i fitnesa, bar manje košta, ak ništ drugo), i na kraju, spremne smo za popevanje. I onda, normalno, kad zabimo se kaj nam je teta Zdenka rekla prošli put, počnemo popevati, onak, splašeno, bi-nebi, onda moramo stati, pak s početka, tak dugo dok se ne zmislimo kaj treba delati i kak. To se traje brat-bratu oko 15 minut, a onda kak slavujeki zapopevamo, i dok vurica počne delati, to vam je čista milina. Baš za okrepiti dušu i ohrabriti telo. |
|
|||||||||||||||||||||||||||||||||||||||||||||
|
|||||||||||||||||||||||||||||||||||||||||||||
|
|||||||||||||||||||||||||||||||||||||||||||||
Rss
