|
|||||||||||||||||||||||||||||||||||||||||||||||||||||||||||||||||||||||||
|
|||||||||||||||||||||||||||||||||||||||||||||||||||||||||||||||||||||||||
<< natrag
print
e-mail
print
e-mail
Jena FA probaStela Pavetić, 2.11.2007. Zdravo! Sam se pak nekak zmislila da bi mogla nekaj z vami podeliti. No, dobro, bum iskrena, me je naš precednik zmislil. Kaj morem kad ja to zabim. Zmislim se ja tu i tam, da bi nekaj trebalo napisati, ali znate kak se veli, dok nije sila, se ne mora. Dok sila stisne, več je negda kesno, ali negda te taman potira i da ti poticaj. Tak je bilo i z menom. Ali nije sam to, ve sam se zmislila jene zgode kaj nam se dogodila na probi velike folklorne skupine (kak to lepo zvuči – čist onak profesionalno, kaj ne?). Tak smo vam se mi skupili, kak i inače, v petek koli osme vure (nekomu je to petnajst do osam, nekomu je to pol devet, no ipak se nekak skupimo, pak moremo delati) vu našoj prostoriji. Mi smo inače na zadnjem katu vu takozvanoj zgradi "Narodne tehnike". Nismo baš bogzna kakvi tehničari, ali tam su nas smestili, na zadnji kat, i ve sima drugima skačemo po glavi. Več smo ozbilno narušili statiku zgrade, i splašili one kaj odspod imaju engleski, ali još smo navek tam, i valda bumo tak dugo dok nas odonud ne stiraju, ili dok ne zrušimo zgradu. Pa kaj bu prije. Sam se nadamo da nebu ništ od navedenoga, jer smo se baš lepo udomačili. Imamo jenu velku prostoriju di plešemo, jenu punu nošnji i drugih rekvizita, i jenu di se družimo prije i posle probe. I za nekakve velke svetke, dok slavimo nečiji rođendan ili tak nekaj. Zna se koja nam je najdraža. No, da nastavim. Tak smo se mi skupili, taj petek, koli osme vure, skup z našim koreografom, i počela je proba. Onak kak to i inače počne. Naši tamburaši sviraju nekaj jako brzoga, pa onda valjda ih zgrabi inercija, i još se ubrzaju, a mi po komandama našega koreografa, jurcamo po prostoriji v krug i zagrijavamo pete, kolena, gležnje i ostale delove naših instrumenti – nogi. I se to pokušavamo v ritmu kojega nam naši mužikaši nudiju – obično jako brzome. Ali dobro, to nekak spreguramo. Furt skračujemo kruga, a naš koreograf viče – širi, pak se proširimo, pak onda začas nazaj skupimo, lakše je nakratko skakati nego na dugo, razmete, ne? I to tak jeno par minut, onak, da si nabijemo kondiciju. Od koje, po domaći rečeno, nemamo ni k. Bar ja, za druge ne znam. Ali po kolektivnom disanju i grabljenju zraka posle zagrijavanja, nekak si se mislim da ni drugi nemaju baš puno više od k. No, i dok naš koreograf misli da smo dost hopsali, ili dok nam mužikašima ponestane inspiracije, tak stanemo. I moremo dale plesati. Nemremo plesati bez zagrijavanja. Nedaj bog da si neko ftrgne nogu ili krivo skoči ili nekaj slično. Ko bi onda plesal? A i nije samo zato. Si strepimo od glasa našega koreografa dok viče "Prigorje!" ili nekaj slično. Znate vi kolko treba zraka za nekaj takvoga? Na pol koreografije mi se počne vrteti, jer mi mozak ne dobiva dost zraka. Se potrošim v plučima. I onda jeno vreme patim od akutnog nedostatka zraka, pa hiperventiliram, pak se znojim, ne od težine plesa, nego od straha da nem omeglela. A nedaj bože da vikne nekaj kak na primer "Baranja" ili još bole, "Posavina". Odma me nekaj preseče i najrajši bi si sela. No da, nije to tak strašno kak se čini. Da idem redovno na probe, nebi to tak bilo. Imala bi kondicije, i se bi bilo za pet. Ali ovak, dok ja idem saku prestupnu, a tak mi se čini i ostalo društvo, i dale bumo dahtali i grabili zraka. No dobro, ali da se ja vrnem na tu famoznu probu. Tak smo mi počeli plesati. Malo Zagorja, malo Međimurja, malo Prigorja, i tak dale, ponavljamo koreografije, da nebi kaj zabili, ili kaj bi se možda malo prisetili, ili još bole zvežbali. Menjamo se – malo jeni, malo drugi – jer nas negda zna biti i više neg kaj treba za jenu koreografiju, - čudo, ali se zna dogoditi – i tak jeni plešeju Prigorje, jeni Zagorje i tak več – kak koga zapadne. I najemput – zija naš koreograf – Bunjevac. To smo ne plesali od negda. I dojde na red naša mlađa populacija – naša deca – kak ih od milja zovemo. Lepo su se složili – bez greške, kak bi čovek rekel – i počelo je svirati. I plešeju, plešeju, mi smo se lepo složile (pod "mi" naravno, mislim na "stare koke") kakti publika i gledimo. I gledimo i gledimo, i nemremo verovati svojim očima. Oni kaj su plesali, neki su to i znali plesati, ali neki od njih su bogme prvi put plesali. Ali nisu niš rekli, sam su si stali plesat. No dobro, plešu oni, popevaju, znoj curi v potocima, kaj v potocima, v rekama, mi gledimo, naš koreograf gledi, ide v jen kut, pak v drugi kut, pak napre, pak gledi z jene strane, pak z druge, ali niš ne komentira. Mi smo si mislili, ve bu nekaj rekel, bu zastavil, bu pokazal nekaj, ali ih je samo pustil da plešeju onak kak su si oni to sami zamislili. Valjda je štel videti kak bu to itak se zišlo. No, i stane muzika, staneju plesači, prestanemo mi buljiti v plesače i preselimo naše oči pune iščekivanja na našega koreografa, jer itak ve treba čuti kaj bu on na se to rekel. V našoj prostoriji vam je inače navek nekakva graja, jer dok drugi zagrijavaju noge i vežbaju koreografije, moramo mi zagrijavati glasnice – se nemre popevati bez toga, ne? Ali v tom trenu, da je bilo muhi, ja mislim da bi i one ftihnule, od iščekivanja. A naš koreograf je samo glasno uzdahnul, stal pred nas i rekel mirno i uopće bez ikakvoga uzbuđenja i zamerke: "Neizmjerno mi je drago što ste svi ostali živi". A tak smo se nekak bome i mi osečali. |
|
|||||||||||||||||||||||||||||||||||||||||||||
|
|||||||||||||||||||||||||||||||||||||||||||||
|
|||||||||||||||||||||||||||||||||||||||||||||
Rss
