|
|||||||||||||||||||||||||||||||||||||||||||||||||||||||||||||||||||||||||
|
|||||||||||||||||||||||||||||||||||||||||||||||||||||||||||||||||||||||||
<< natrag
print
e-mail
print
e-mail
V korak z tehnikomAleksandar Horvat, 24.9.2007.  Malo sam se zlagal v naslovu, nismo baš v korak, to tek mislimo biti. A kaj je? Ima jedna sitnica v KUD-u radi koje smo malo šepavi pak idemo kak "nevozne" krave. Usput, to za "nevozne" krave mi je tast jemput rekel dok smo nosili korpu v raskorak i klimali se, a ja sam ga razmel "nervozne" krave. Normalno da se je smejal, pak smo se još bolje s korpom klimali. E dakle, kaj je? Ima v KUD-u jedna siva škatula na četiri noge, koja se zašteka v elektriku, stisne se "gas", pak se na njoj stišćeju tipke. Ta stvar se zove stručno harmonij. I igra.. Kak god ima lepo ime, ne bi se moglo reći da jednak i igra. Valjda ima "krizu indentiteta". Nemre se sam sobom dogovoriti jel' je on praf zapraf klavijatura ili trubenta. Ak' meknete nogu z gasa... nikaj, tišina. Stisnete ga nazaj, igra! Jedino ne v zadnjoj oktavi. Gas (koji je skorom isti kak gas za Singericu) zaprav tira ventilatora koji puše čez piske kak na harmoniki a koji puščaju zvuka dok stisneš tipku. Zato v zadnjoj najvišešoj oktavi imamo problem. Piski se tak mučiju, ali te vražji ventilator ruži kak za peneze, opće se gornja oktava od njega ne čuje. Legenda je te naš stari harmonij. Prepelal se je z društvom v autobusu povdož i poprek, još negda dok smo ženskoga zbora meli (ve se zoveju MPZ Podravina, kak se negda zbor v Ludbregu zval). Odigral je harmonij mužike i mužike i to bogme od Vardara do Triglava, dok je još toga bilo. A ve mu nekak više nejde. Stari je, piski su mu se rasklecali, zaštopali ili potrošili, več kak koji, cviliju, a niti ventilator na elektriku više nebre pomali i postiha puhati nek samo brenči. Naša teta Zdenka se na probi, de se ženske vučiju popevati (po književni, "stare koke"), već par let kolje z njim, igra ga na jen glas, a negda joj vujde i na dva pak fletno ostane bez daha (mislim na harmonij), negda zabi na gas (mislim na tetu Zdenku) pak se ne čuje intonacija... i tak... došlo je konačno vreme da se tomu stane na kraj. Dogovorili smo se! Mi moramo iti v korak z tehnikom. Kak i saki pošteni radnik koji je svoje zdravlje ostavil na poslu kaj bu nekomu drugomu dobro, naš harmonij ide z ovim tjednom v zasluženu invalidsku penziju. Na njegovo mjesto dolazi jen mladi dečec koji ima jako moderno i preštimano ime: Yamaha PSR E 303. Makar mu je ime ne tak harmonično, i lefko bi si jezika ftrgel na njemu, moderna znanost ga je napravila kak vuricu, čistam perfektno: ima velke bleščeče klavirske tipke v 5 oktavi, skroz od gornje do doljnje, male žaruljice koje migaju kaj znaš da je živ i da nekaj dela, zna se pretvarati da je klavir i još kojekaj drugo kaj sam još nigdar ne čul, i zna oponašati pleh mužiku, bobnje, frulice, trobente, violine, zvonce i kojekakve druge instrumente koje su ljudi zmislili dok su ne meli kaj drugo delati... a kaj je najbolje, nema ventilatora! No dobro, ima doduše jednoga čist maloga, koji se postiha vrti i vun toploga zraka rivle kaj se japancu pamet ne pregreje. Je, je! Ima i pamet, more igrati i sam, ako ga nafčiš, zna sam slagati akorde (ono dok tri tipke najemput moraš držati, dur, mol, sedmica, maj, prosinac...) makar če imaš samo jednoga prsta. Se to on zračuna i odigra. Još bomo s njim dobili kojekakve kable za v kompjuter zaštekati i šemige na koje se bude del kaj ga ne bi trebalo na podu igrati. Joooj, kak bu teta Zdenka vesela! Još da bi mu mogla onak zdaleka zaviknuti: "Yamaha, daj C dura!"... hehe, no, je... kak je god preštimani, rekli su da se za te peneze ne moči z njim spominati. Kaj češ! Nek on samo lepo igra. I naše "stare koke" (MŽVS) budu jako vesele. To bo ve prvenstveno njihova zanimacija. Po meni su ga one i zaslužile, tak kaj su njih devet nadglasale onih drugih 300 v Varaždinu pak ideju lepo na Mariju Bistricu popevat kaj buh ih cela država poslušala. 'Ko zna gde bu im ve kraj. Novi dečec z zvučnikima (po svetski, sintisajzer) dolazi v ovem tjednu kaj je ve na redu. To bu baš lepi događaj. Ako bog da, budu "stare koke" još ovu sredu na njega popevale. No, ako pak ne, budu se još jen tjeden strpele, do druge probe. Ak su mogle tak dugo ventilatora poslušati onda sedem dani ni nekaj strašnoga. Baš sam rekel, če budu ovi v Varaždinu kaj komplicirali da je još ne došel v dučan ili kaj drugo, bum sam odišel v Japan po njega i za vuho ga dovlekel. Malo me je strah kaj nam naš stari harmonij nebi zrital do kraja, a onda kaj? Bumo još bolje šepavi jer nemo meli nikakvu tehniku, niti takvu kakvu smo meli. Eh, naš stari harmonij. Nekak si mislim... mi ga je malo žal. Dosta je dal i puno ljudi se je kraj njega nafčilo popevati. I tak lepo v tišini, penzija. Dolaziju mlajši, jakši i spametnejši a meni je žal kaj bi ga v smetje hitili. Mislim da mu bumo jednoga kuta v naši dvorani dali, pak makar na njega kakvoga teglina s cvetjem deli, kaj nebi bilo da je baš ne od nikakve koristi. A ako bu trebalo, bu još on negda zaigral, čistam da pokažemo drugima da je još živ, samo je v penziji. |
|
|||||||||||||||||||||||||||||||||||||||||||||
|
|||||||||||||||||||||||||||||||||||||||||||||
|
|||||||||||||||||||||||||||||||||||||||||||||
Rss
